O Consorcio de As Mariñas licita contedores e medios para aumentar a reciclaxe

O Consorcio de As Mariñas segue adiante coa implantación do quinto contedor e co impulso á reciclaxe na orixe. A entidade, da que forman parte os concellos de Culleredo, Cambre, Bergondo, Oleiros, Sada, Betanzos, Abegondo e Carral, vén de sacar a licitación o suministro de novos contedores para biorresiduos de grandes produtores, así como outras actuacións para a instalación e mellora da eficiencia na xestión de residuos.

O contrato, dividido en cinco lotes, supón un investimento de 310.371 euros. O Consorcio xustifica que o «crecemento do servizo», así como «novas necesidades operativas», fan necesaria a contratación de «actuacións específicas» para mellorar a calidade da separación, a trazabilidade dos fluxos e a cobertura territorial. Por iso refórzanse os medios materiais e operativos vinculados, sobre todo, á xestión dos biorresiduos.

A adquisición destes medios materiais coincide tamén co novo contrato para a recollida do lixo, tamén en licitación. Neste apóstase por un aumento da cobertura territorial e a mellora ambiental do servizo, en particular dos produtores singulares, que suman uns 461 en total na actualidade, pero cuxo número irá crecendo nos próximos anos. Así, onde antes só se recollía cartón, agora o Consorcio aumenta a recollida de envases lixeiros e outros residuos orgánicos.

Esta nova licitación inclúe, no primeiro lote, o suministro de 300 contedores destinados á recollida separada de biorresiduos por grandes produtores. Cada un terá que ter unha capacidade de 120 litros por unidade e serán usados por comerciantes, hostaleiros, comercio alimentario e outros produtores.

O segundo lote é o de maior importe, uns 123.700 euros, e está dedicado á compra dun vehículo específico para residuos de orixe vexetal. Este terá que ser novo, 100% eléctrico e «preparado para a transformación, montaxe de carrozaría e instalación de equipos especializados», cun uso para a recollida separada de restos de podas, ramas ou céspede. Este camión terá que ter unha batería con «capacidade suficiente» para as rutas no ámbito do Consorcio de As Mariñas, así como unha autonomía funcional mínima de hora e media de traballo para o equipo de carga.

Ademais, comprarase un novo punto limpo móbil para a recollida selectiva de residuos téxtiles, baterías e pilar ou aerosoles.

O Consorcio tamén busca avanzar na formación para a compostaxe doméstica e comunitaria. Aínda que no contrato para a recollida do lixo xa se contemplan campañas de concienciación sobre o uso destes contedores, neste proxecto proponse, ademais, un mínimo de 16 formacións conxuntas (dúas por cada municipio), así como a elaboración de ata 1.000 guías informativas e seguimento individualizado ás persoas participantes.

O contrato péchase con actuacións para mellorar os puntos limpos fixos, coa instalación e substitución en peches e portais, ademais da configuración de novos sistemas de alarma e videovixilancia.

Elaborado a partir da información publicada por laopinioncoruna.es.