Veciñanza de Miño concéntrase para pedir máis prazas no autobús que leva o alumnado a Betanzos

Aínda era de noite cando varias decenas de persoas comezaron a xuntarse este venres, 25 de setembro, nas inmediacións da parada de taxi de Miño, a carón da parada do autobús que leva cada mañá o alumnado do concello aos institutos de Betanzos. A concentración estaba convocada ás 7:50 e tiña un motivo concreto: que ese autobús teña prazas abondo para todos os estudantes que o necesitan para ir a clase.

Mentres o autobús estaba na parada, os asistentes cruzaron varias veces o paso de peóns situado diante del. Na zona estivo presente un vehículo policial. Despois, o grupo quedou reunido na esquina próxima ata que xa era de día.

Viaxar de pé ou quedar na parada

Emilia Boquete Suárez, veciña de Miño, resumiu así a situación a BetanzosHoxe: «Os rapaces van para Betanzos e non teñen autobús». Segundo o seu relato, na parada quedaron, «que eu vise, vinte nenos sen poder ir ao colexio».

O problema, explica, non é que o autobús deixe de pasar, senón que non chega para todos: «Non faltou o bus, falta outro autobús máis. O que necesitamos son máis prazas, porque agora ese autobús vai con nenos que teñen que ir de pé». E pregúntase que pasaría ante calquera imprevisto na estrada: «Se hai unha circunstancia por calquera cousa, unha freada, algo… quen responde por eses nenos que non van nos seus asentos?».

Segundo esta veciña, antes había dous autobuses e agora hai un só, «cando hai máis nenos».

Subir catro paradas antes para ter sitio

Boquete non ten fillos nin netos que usen esta liña —«simplemente vivo aquí e vexo a situación»—, pero si amizades con fillos que a collen cada día. Conta que algún estudante xa sobe «catro paradas antes da súa parada para non quedar en terra».

Quen queda na parada perde a clase, e nalgúns casos queda só: «Moitos nenos teñen os pais traballando. Os pais marcharon para o traballo e eses nenos quedan sen auxilio ningún». Lembrou a súa propia experiencia, cando a súa filla ía de nena «cunha chave ao pescozo» para entrar na casa antes que os pais: «Volvemos aos tempos de atrás? Non, home, non, por favor. Que un neno non quede aí, porque os seus pais están traballando. Que fai ese neno todo o santo día?».

Que se pide

A situación, segundo explica, vén xa «do curso pasado», e a reclamación diríxese á Xunta, que é a administración responsable do servizo. Preguntada pola resposta recibida, foi breve: «A resposta vese. Ningunha». Con máis alumnado este curso, di, o problema é maior: «Se o ano pasado xa había problemas con menos alumnos, este ano, que hai máis alumnos, é peor».

A petición concreta é «máis autobuses, máis servizo». E non só para os estudantes: segundo ela, tamén quen quere ir en transporte público á Coruña ou a Betanzos bota en falta frecuencias.

Contexto

A falta de prazas nesta liña xa se fixera pública esta semana. En marzo de 2023 a Xunta reforzou os servizos de autobús entre Miño e Betanzos os xoves pola tarde, cunha ida e unha volta en horarios próximos ás clases de tarde do IES As Mariñas. As incidencias do transporte metropolitano na comarca foron tamén o motivo da reunión de concellos convocada en Betanzos para o 21 de setembro.

BetanzosHoxe non recolleu polo de agora a versión da Xunta sobre as queixas expresadas na concentración.