Luz verde ao GADIS de Costa Miño: xa só faltan as obras

A Xunta de Goberno Local do Concello de Miño concedeu esta semana a GADIS a licenza de obra para construír a superficie comercial de Costa Miño. Era o último trámite administrativo que faltaba antes de empezar a obra, así que o seguinte paso será xa o inicio da construción do supermercado.

Semienterrado e duns sete metros de alto

O supermercado levantarase nunha parcela de 3.511,98 metros cadrados delimitada polas rúas Camposas, Madanela e Cepeira e pola Avenida de Xarío. O edificio irá nunha ladeira, semienterrado e cunha altura total aproximada de sete metros, parecida á dunha vivenda unifamiliar. Segundo o Concello, así redúcese o impacto visual e consérvanse as vistas e a entrada de luz das vivendas próximas. O goberno local destaca tamén a integración urbana do proxecto, o seu deseño arquitectónico coidado e a aposta pola sustentabilidade ambiental.

Pescadería, carnicería e 48 prazas de aparcamento

O establecemento terá planta baixa e unha pequena entreplanta, cunha superficie construída de 1.518,35 metros cadrados, e contará con atención directa en pescadería, carnicería e charcutería. A entrada principal á parcela será pola Avenida de Xarío e a saída, pola rúa A Madanela, o que, segundo o Concello, garante unha circulación fluída e segura para vehículos e peóns. O proxecto inclúe ademais un aparcamento con capacidade para 48 prazas.

A actuación contempla tamén axardinar os taludes e os retranqueos con especies autóctonas de pouco porte e substituír as árbores enfermas ou deterioradas das rúas Camposas e Cepeira. A concesión do espazo terá unha duración de 30 anos.

«Un antes e un despois»

O alcalde de Miño, Manuel Vázquez Faraldo, sinalou que esta licenza achega o municipio a «contar cun servizo moi demandado e moi necesario, sobre todo polo crecemento de poboación que está a vivir Miño e, en particular, Costa Miño». «É un fito que vai marcar un antes e un despois para a urbanización», engadiu.

Elaborado a partir da nota de prensa e da imaxe do proxecto que remitiu o Concello de Miño.