A Biblioteca de Betanzos retoma o club de lectura con Antía Yáñez

A Biblioteca Municipal Castelao de Betanzos retoma o seu club de lectura dirixido pola escritora Antía Yáñez para o curso 2026-2027. As sesións comezan o xoves 1 de outubro e o prazo de inscrición abre o 15 de setembro ás 10:00 horas, con 20 prazas que, segundo a experiencia dos últimos anos, voan en cuestión de minutos.

Dous xoves ao mes na Biblioteca

O club é quincenal: reúnese dous xoves ao mes, de 18:30 a 20:00 horas, sempre de xeito presencial e na propia Biblioteca. Non é unha decisión casual. Ángel Arcay, director da Biblioteca, Arquivo e Museo das Mariñas, explica a BetanzosHoxe que o formato presencial responde á necesidade de «crear espazos comúns de intercambio para toda a comunidade, onde a xente se poida ver, falar e ir tomar un café ao acabar a sesión, máis alá da frialdade das pantallas».

A primeira lectura xa está decidida: Beleza vermella, de Arantza Portabales, novela en galego. Ao longo do curso alternaranse formatos (cómic, poesía, ensaio, teatro, novela) e lecturas tanto en galego como en castelán. A Biblioteca facilita un exemplar a cada participante, que o ten en préstamo durante quince días e o devolve na seguinte sesión.

Como inscribirse

A participación é gratuíta para os socios da Biblioteca, e quen aínda non o sexa pode facerse socio no momento: é un trámite dun minuto, tamén por internet, que só require uns datos básicos de contacto. Ao tratarse dun servizo municipal, o carné non ten custo.

Se se cobren as 20 prazas, haberá lista de reserva para as baixas que se produzan durante o curso. Arcay recoñece que fixan unha hora de inicio para as inscricións porque saben que «ás 10:05 do día 15 estarán cubertas todas as prazas». Non se admiten invitados non rexistrados: nun grupo no que todo o mundo participa e leva o libro lido, engadir persoas novas alongaría demasiado cada sesión.

Tres clubs e unha lista que non para de medrar

O club con Antía Yáñez botou a andar en 2022 e, segundo a Biblioteca, sempre tivo moi boa acollida. Non é o único: desde hai varios anos funciona tamén un club en quenda de mañá que dirixe de xeito voluntario a veciña Mar Nieves e, o curso pasado, a demanda foi tal que outra veciña, María Doporto, ofreceuse para facerse cargo dun terceiro club en quenda de tarde.

Para o director da Biblioteca, o club é unha maneira de fomentar a paixón pola lectura abríndose a libros que «seguramente de primeiras non escolleriamos», saír da zona de confort lectora e achegarse a unha obra desde distintos puntos de vista. E algo máis: «nos tempos que corren é necesario crear lugares seguros e non ligados ao consumo para que a xente poida sentar a conversar ou pasar a tarde», eses espazos que algúns chaman terceiros lugares.

Antía Yáñez (Burela, 1991) é enxeñeira de camiños de formación e autora de obras como Senlleiras (Premio Illa Nova de Narrativa), Non penses nun elefante rosa ou O clan das Barbies, e coordina varios clubs de lectura en Galicia.

Entrevista a Ángel Arcay, director da Biblioteca, Arquivo e Museo das Mariñas, para BetanzosHoxe.