Unha avaría eléctrica deixa sen luz a máis de 3.000 veciños das comarcas de Betanzos e A Coruña

Unha avaría eléctrica rexistrada este martes pola tarde na liña de media tensión de Cesuras deixou sen subministro durante unhas 18 horas a máis de 3.000 veciños das comarcas de Betanzos e A Coruña. O servizo quedou restablecido este mércores sobre as 10.50 horas.

Segundo informa Naturgy, ao redor das 16.35 horas do martes detectouse unha incidencia na liña de media tensión de Cesuras, que afectou a uns 200 clientes de UFD, a distribuidora eléctrica de Naturgy, e tamén á distribuidora Udesa, que á súa vez subministra electricidade a uns 3.000 clientes da zona. Desde o primeiro momento, os equipos de UFD realizaron múltiples manobras na rede para recuperar o servizo o antes posible.

A compañía eléctrica asegura que para executar estes traballos tamén foi necesario illar outra liña e que se acabou localizando a avaría nun tramo subterráneo da mesma. A reposición do subministro realizouse de forma progresiva, con tempos de recuperación de entre 180 e 1.062 minutos, e ás 10.50 quedou totalmente normalizada e con servizo.

Unha das afectadas, a veciña de Vilacoba (Abegondo) Charo Touriño, afirma que non é a primeira incidencia que sofren e que o pasado 19 de xuño tamén estiveron horas sen subministro. "Nos quedamos sen luz e sen internet, pero tamén sen auga, xa que os pozos funcionan con electricidade. Ademais, estes episodios danan aparellos: en xuño estropeóuseme o motor da auga, pero tamén tiven que cambiar outros electrodomésticos e disto ninguén se fai cargo", di Touriño.

En Cesuras, o suceso tivo lugar poucos días despois da crise da auga, cando unha avaría nunha captación deixou sen servizo durante seis días a parte do municipio de Oza Cesuras.

A situación agrava nas vivendas onde hai animais ou nas explotacións gandeiras da zona. Os afectados reclaman un maior mantemento e control da rede de subministro: "Estamos como nos 80, con cortes de luz continuos", di Charo Touriño.

Elaborado a partir da información publicada por elidealgallego.com.