Cae a rede que entregaba droga en Betanzos: 12 detidos e seis armas

A Garda Civil deu a coñecer este xoves, 5 de novembro, a Operación Petronium-Heracles, coa que desarticulou unha rede dedicada á distribución de droga e aos «vuelcos» en Galicia. Betanzos era un dos lugares onde a organización entregaba a droga, e a investigación tutelouna a praza número 3 da Sección Civil e de Instrución de Betanzos, coa colaboración do fiscal delegado antidroga da Coruña.

Hai 14 presuntos implicados: 12 detidos e dous investigados. Investíganse delitos de tráfico de drogas, pertenza a organización criminal, branqueo de capitais, tenza ilícita de armas e receptación. Na operación traballaron xuntos o Equipo de Delincuencia Organizada e Antidroga (EDOA) da Garda Civil da Coruña, a Unidade Operativa do Servizo de Vixilancia Aduaneira da Coruña e a Unidade de Asuntos Internos da Policía Nacional.

A cocaína que ía a Betanzos

A finais de outubro, os investigadores detiveron a tres membros da organización cando facían unha entrega de cocaína na comarca do Salnés, en Pontevedra, que tiña como destino final Betanzos. Segundo a Garda Civil, interceptaron o vehículo en Betanzos, coa droga oculta, e o xulgado decretou o ingreso en prisión provisional sen fianza dos tres.

Despois, a autoridade xudicial enviou a prisión provisional sen fianza a outros cinco detidos. Nunha declaración en vídeo, unha portavoz da Garda Civil confirmou que a autoridade xudicial decretou o ingreso en prisión provisional sen fianza de oito dos detidos. Son os oito que, como contou BetanzosHoxe, a xuíza de Betanzos mandou a prisión nesta causa.

Ademais de en Betanzos, a rede entregaba droga sobre todo no Salnés e nas cidades de Ferrol, Narón e A Coruña, e detectáronse tamén transportes á provincia de Zamora. A nota da Garda Civil non di se algún dos detidos vive en Betanzos.

255.000 euros por cemento

A investigación durou nove meses. Comezou cun mozo veciño de Vilagarcía de Arousa que, presuntamente, se valía doutras persoas para transportar cocaína e para levar plantacións de marihuana en varios concellos da provincia da Coruña. Aos poucos meses, os investigadores viron que se relacionaba con varios veciños de Ferrol e Narón coñecidos pola súa vinculación co crime organizado, o tráfico de drogas e a tenza ilícita de armas, que conducían vehículos de alta gama e levaban un alto nivel de vida.

Entre o que a organización tería feito, a Garda Civil destaca o engano a un veciño de Narón, que pagou 255.000 euros por 30 quilos de cocaína dos que 29 eran cemento en po. Os investigadores souberon tamén de intentos de «vuelcos»: accións violentas, con armas, contra outros clans do tráfico de drogas para roubarlles droga ou diñeiro.

Armas, diñeiro e doce vehículos

Na fase final da operación fixéronse 17 entradas e rexistros. Os axentes atoparon cocaína, haxix, MDMA e heroína, seis armas de fogo, grandes cantidades de munición e uns 138.000 euros en efectivo. Tamén se incautaron doce vehículos, dous deles de alta gama.

Entre os inmobles rexistrados están unha vivenda de Narón que facía de piso de seguridade ou «guardería» para agochar armas, droga e diñeiro, e un domicilio da cidade da Coruña onde funcionaba un punto de venda de droga.

Elaborado a partir da nota de prensa da Comandancia da Garda Civil da Coruña, conxunta coa Policía Nacional e coa Vixilancia Aduaneira.