As obras de Dona Águeda seguen paradas á espera da Deputación
O Concello de Betanzos di que xa rematou os trámites para modificar o proxecto e que llo enviou á Deputación, que o cofinancia. Ata que se retomen os traballos, a empresa fará actuacións para minimizar os problemas da praza.
As obras da praza de Dona Águeda seguen paradas, pero o proxecto modificado xa está na Deputación. O Concello de Betanzos asegura que completou todos os trámites administrativos que lle correspondían e que agora espera que a tramitación provincial se axilice ao máximo para retomar os traballos canto antes. Non dá unha data para a volta das obras.
A alcaldesa, María Barral, atribuíu a paralización a un erro técnico na redacción do proxecto inicial. Segundo explicou, daquela non se detectou que a solución de illamento e impermeabilización prevista tiña un grosor moi inferior ao necesario. «Foi unha vez aberta a zona de actuación cando se comprobou que o estado real da praza era máis complexo do que reflectían as medicións previas», dixo.
Actuacións para reducir as molestias
Mentres a Deputación completa a tramitación, xa que o proxecto está cofinanciado polas dúas administracións, a empresa adxudicataria fará actuacións para minimizar os problemas existentes antes de abordar os traballos definitivos. Pediullo o Concello, co obxectivo de reducir as molestias aos veciños durante este período. A nota municipal non concreta en que consistirán nin cando se farán.
Barral di entender o malestar dos veciños e dos propietarios das prazas de aparcamento situadas baixo a praza, que levan tempo sufrindo filtracións. Segundo a rexedora, o Concello non quixo continuar cunha actuación que non resolvese o problema de fondo e por iso optou por paralizar os traballos, modificar o proxecto e asumir o incremento económico.
Máis de 190.000 euros, e 40.000 máis
As obras están incluídas nun programa provincial e partían dun investimento superior aos 190.000 euros. En setembro o Concello aprobou unha modificación orzamentaria de algo máis de 40.000 euros para cubrir o aumento do custo.
A intervención contempla a renovación do pavimento, a reorganización do mobiliario, a eliminación das xardineiras fixas, a mellora da recollida das augas pluviais e a solución definitiva dos problemas de impermeabilización cara á planta inferior.
Elaborado a partir da nota de prensa que remitiu o Concello de Betanzos.
Segue lendo
Comentarios
Aínda non hai comentarios. O primeiro pode ser o teu.