Betanzos segue adiante coa súa petición dun Parador no casco histórico

O Concello de Betanzos mantén a súa reivindicación dun Parador de Turismo no casco histórico. A alcaldesa, María Barral, resume así a actitude municipal: “Hasta que lo consiga, no pararé”.

A iniciativa non ten aínda un compromiso definitivo, pero foi avanzando desde a presentación inicial de varias alternativas ata chegar a un inmoble concreto que a institución considera axeitado para un establecemento destas características.

A última alternativa trasladada a Madrid é un inmoble privado situado na contorna da antiga Torre de Lanzós. Trátase dun edificio de algo máis de 1.400 metros cadrados que está en venda e que o Goberno de Betanzos xa puxo sobre a mesa de Paradores de España.

A alcaldesa asegura que volveu trasladar esta opción á entidade, convencida de que reúne as condicións necesarias. Aínda que a ubicación non é totalmente nova, xa que aparecera entre as opcións analizadas por Betanzos cando, hai dous anos, trasladou a Paradores tres hipotéticos emprazamentos, na contorna de Santa María, San Francisco e Santiago.

Naquel momento escenificouse o compromiso de avanzar e concretar a actuación nalgún deles porque en todos había un obstáculo: ningunha das alternativas era de titularidade municipal. Aínda que o Concello de Betanzos mantivo contactos coas autoridades eclesiásticas para explorar a adquisición dalgún dos seus inmobles, non avanzaron, pois non existía intención de vender por parte da Igrexa. Pola contra, a opción privada da contorna da Torre de Lanzós presenta unha circunstancia que a diferencia: o inmoble está dispoñible no mercado.

A alcaldesa considera que se trata dun emprazamento “idóneo”, tanto pola súa localización como polas súas características. Ademais, sinala que o edificio se atopa nun ámbito contemplado polo Pepri (Plan Especial de Protección e Reforma Interior) dunha maneira que, na súa opinión, encaixa coa idea de Paradores de España.

O seguinte movemento, con todo, non depende unicamente do Concello de Betanzos, pois require un acordo entre os propietarios e Paradores. Aí está unha das claves da operación, como recoñece Barral. Porque o Goberno de Betanzos pode defender o emprazamento, mediar e trasladar a proposta, pero o proxecto necesita que as outras dúas pezas cheguen a un entendemento. A isto súmase outro condicionante, xa que actualmente Paradores está centrando os seus esforzos no mantemento dos establecementos que xa forman parte da súa rede en toda España.

En definitiva, o proxecto sitúase nun horizonte de medio prazo e non conta, por agora, cunha data concreta. “Todo va mucho más lento de lo que yo quisiera”, admite Barral. “Yo creo que eso también saldrá”, sostén a alcaldesa de Betanzos.

A aposta municipal é dobre, en tanto a apertura dun establecemento así no casco histórico implicaría a rehabilitación dun edificio e, ao mesmo tempo, a ampliación da oferta de aloxamento no corazón de As Mariñas. “Un parador chiquitito en el casco histórico sería muy importante para la ciudad”, resume Barral antes de enumerar algúns dos efectos que tería: “La recuperación y la rehabilitación de un edificio importante, más oferta y dinamización de casco histórico... Todo es importante”, apostila a mandataria que, aínda que asume que queda camiño por percorrer e que os tempos non son os que lle gustaría, insiste en que seguirá co seu empeño por un Parador de Turismo.