Betanzos pide á Xunta que explique como repartiu as 25 novas residencias para maiores

A alcaldesa de Betanzos, María Barral, quere saber como decidiu a Xunta onde van as 25 novas residencias para persoas maiores que anunciou. Pide á Consellería de Política Social que faga públicos os criterios e o procedemento que empregou para escoller as localidades.

Barral explica que o Concello non se opón a que se constrúan eses equipamentos. O que pide é coñecer como se tomou a decisión e que posibilidades tiveron os municipios para contar as súas necesidades.

A alcaldesa sinala que, das 25 residencias previstas, 23 están en municipios gobernados polo Partido Popular. Di que ese dato fai aínda máis necesario saber que criterios usou a Administración autonómica para elixir as localidades beneficiarias.

"No estamos dicindo que esos municipios no necesiten estos equipamientos, ni cuestionamos que los reciban", afirma Barral. A rexedora reclama coñecer "qué criterio se siguió para seleccionar los municipios" e "qué procedimiento se utilizó".

O Concello di que cumpre os requisitos

Segundo os criterios que deu a coñecer a propia Xunta, o programa vai destinado a municipios de menos de 25.000 habitantes e sen determinadas infraestruturas residenciais públicas. Desde o Concello de Betanzos sosteñen que o municipio cumpre esas condicións.

Ademais, destacan que Betanzos é cabecera comarcal e que non ten unha residencia pública para persoas maiores nin un Centro de Día público. Para Barral, estas circunstancias facían razoable que o Concello puidese coñecer o programa e presentar a súa situación ante a Consellería.

"No pedimos que se le quite nada a ningún municipio. Pedimos haber tenido la misma oportunidad que los demás de explicar nuestras necesidades y conocer el procedimiento para acceder a estos recursos", di a alcaldesa.

Peticións de reunión sen resposta

Barral lembra que desde a Alcaldía se pediron varias reunións coa conselleira ao longo deste ano. Especialmente despois de que o pasado mes de xaneiro se coñecesen declaracións dun alcalde dun dos municipios que agora están entre os beneficiarios, nas que xa se apuntaba a previsión de construír unha residencia nesa localidade.

Segundo explica a rexedora, o Concello quería coñecer os criterios do programa e trasladar as necesidades de Betanzos, tanto no relativo a unha residencia como a un Centro de Día.

"No fuimos recibidos. La única respuesta que obtuvimos, después de numerosas peticiones, fue que la solicitud estaba en valoración", asegura Barral.

Agora, di, esa situación contrasta co anuncio das 25 residencias xa previstas. "Seguimos en valoración mientras conocemos que ya están decididas 25 residencias", apunta.

Que se explique todo o proceso

A alcaldesa pide á Xunta que faga públicos os criterios de selección, o procedemento seguido, os municipios que se tiveron en conta, a información que solicitaron ou trasladaron os municipios e os órganos que participaron na decisión.

Tamén pregunta se houbo unha convocatoria aberta, se os municipios podían presentar propostas e que requisitos concretos se valoraron para determinar as localidades finalmente seleccionadas.

"No queremos privilegios. Queremos transparencia e igualdad de oportunidades", afirma.

Betanzos tamén reclama un Centro de Día

Para Barral, a situación ten especial relevancia pola falta de servizos públicos para as persoas maiores no municipio. Lembra que Betanzos non ten residencia pública nin Centro de Día público, e que o Concello leva anos reclamando á Xunta que atenda estas necesidades.

Ademais, o municipio conta cun proxecto para construír un Centro de Día na zona de O Carregal.

"Somos cabecera comarcal, no tenemos residencia pública, no tenemos Centro de Día público y llevamos años reclamando a la Xunta que atienda las necesidades de nuestros mayores", sinala a rexedora.

María Barral, que tamén é vicepresidenta da FEGAMP, anuncia que trasladará esta cuestión ao organismo que representa os municipios galegos. Quere saber se existiu un procedemento común e que información se lles facilitou ás entidades locais.

O obxectivo, explica, é determinar que criterios se aplicaron para establecer o reparto das novas residencias e se os municipios tiveron a oportunidade de trasladar as súas necesidades.

A alcaldesa asegura que Betanzos manterá a súa disposición ao diálogo coa Consellería e seguirá reclamando os servizos públicos que considera necesarios para as persoas maiores do municipio, entre eles o Centro de Día.

"No pedimos un trato de favor. Pedimos igualdad, transparencia y la oportunidad de ser escuchados", conclúe.