O Bar Galicia gaña por quinta vez o premio popular da Semana da Tortilla

A tortilla do Bar Galicia foi elixida como a mellor tortilla na votación popular da Semana da Tortilla, o certame dedicado a este produto gastronómico que organiza o Concello de Betanzos. Foi a máis votada entre os 12 locais participantes deste ano. En segundo lugar quedou o Mesón Café de Segundo e, en terceiro, a Adega Lastras.

A alcaldesa, María Barral, e a concelleira de Comercio, Anxeles Veiga, entregaron o premio este xoves pola mañá a Esther Corral Martínez.

Cinco premios do público

É a quinta vez que o Bar Galicia leva este galardón: a súa tortilla xa fora a máis votada na votación popular nas edicións de 2020, 2021, 2022 e 2023. Ademais, gañou o certame na modalidade de xurado profesional en 2021 e 2022.

Os gañadores deste ano

Co premio popular péchase o capítulo de gañadores da Semana da Tortilla. O do xurado profesional, o da Mellor Tortilla de Betanzos, foi para o Mesón Café de Segundo, e Jorge Río Cortés gañou por terceira vez o premio á tortilla caseira.

Iván Quintas Lodeiro, que fai as tortillas do Café de Segundo, contou a BetanzosHoxe como é a tortilla gañadora do xurado.

Información facilitada polo gabinete de comunicación do Concello de Betanzos o 22 de outubro de 2026. Podes ler a nota completa en Novas Betanzos.