O Ineltrón Santo Domingo cae ante o Universidad de Oviedo no Tocayo, 82-95

O Ineltrón Santo Domingo Betanzos sufriu o domingo a primeira derrota da tempada na Terceira FEB. Na súa estrea diante da afección, no pavillón José María Valeiro Iglesias «Tocayo», o equipo betanceiro perdeu por 82-95 ante o Universidad de Oviedo.

Os betanceiros aguantaron o ritmo dos universitarios ata o descanso, ao que se chegou cun 40-42. Despois de varias remontadas, o Santo Domingo puxo o 80-84 no marcador e tivo ocasións de achegarse máis: dous tiros libres de Pablo Ríos que non entraron e un triple de Abelleira, tras un rebote ofensivo de Randolph Acevedo, que tampouco caeu. Quedaban tres minutos. A partir de aí, segundo o club, o equipo chegou sen gasolina e un parcial de 2-11 decidiu o partido.

Acevedo e Rozas, o mellor

A nota do club destaca os 20 puntos de Randolph Acevedo, que hai dous anos xogaba en Segunda Autonómica, os 15 de Abelleira e o dobre-dobre do veterano Marcos Rozas, con 10 puntos e 11 rebotes. Sumaron tamén Pablo Ríos (12 puntos e 7 rebotes), Santi González (10 puntos) e Nico Lagares (8 puntos e 5 rebotes), que saíu moi enchufado nos primeiros minutos.

O adestrador, José Amando Pena «Soviético», explicou así a derrota: «Non puidemos manter o ritmo do equipo de Oviedo. O pouco acerto que tivemos nas triplas (3/24), a presión defensiva e súa superioridade no rebote ofensivo lastrounos durante todo o partido. Aínda que houbo fases nas que mantivemos a intensidade en defensa cun pouco de acerto ofensivo, o que daba lugar á sensación de que podíamos competir ata o final, tres canastras seguidas dos de Oviedo sentenciaron o marcador a falta de dous minutos».

Na previa do partido, o técnico xa sinalara a presión defensiva asturiana como a clave do encontro.

Viaxe a Salamanca

Coa derrota, o Santo Domingo baixa á sétima posición da táboa. A próxima fin de semana ten un desprazamento complicado: visita en Carbajosa de la Sagrada (Salamanca) ao Recoletas Carbajosa, que gañou os seus dous primeiros partidos.

Vitorias dos séniores autonómicos

No resto do club, a nota positiva da fin de semana deixárona os dous equipos séniores masculinos autonómicos, que debutaban na liga:

• Segunda Autonómica: vitoria na casa ante o Baloncesto Narón, 74-70, no último partido da xornada.
• La Goleta (Terceira Autonómica): primeira vitoria da tempada na pista do Calasanz, 66-81.
• Infantil masculino: derrota ante o Montrove, 36-70.

Elaborado a partir da nota de prensa remitida polo Santo Domingo Betanzos o 11 de outubro de 2026. As fotografías, do terceiro cuarto do partido, son do club.