Betanzos pedirá á Xunta que os seus taxis entren na área conxunta da Coruña

O Concello de Betanzos presentará no pleno do martes 29 de setembro unha solicitude formal á Xunta para que o municipio forme parte da Área de Prestación Conxunta (APC) do servizo de taxi da área da Coruña. Esta área está en proceso de creación e, de inicio, inclúe A Coruña, Arteixo, Cambre, Culleredo e Oleiros.

A alcaldesa, María Barral, sostén que deixar fóra a Betanzos na proposta inicial «non responde á realidade territorial, social e económica do municipio nin á intensa relación que mantén diariamente coa cidade da Coruña e cos concellos da súa contorna». Por iso, o Concello pedirá que se revise a delimitación prevista e que se aplique a Betanzos «os mesmos criterios obxectivos empregados para a incorporación dos demais municipios».

Por que o piden

Segundo o goberno local, a petición recolle o que expuxo o propio sector do taxi betanceiro: unha parte moi importante dos seus servizos ten como destino A Coruña ou os concellos limítrofes. A normativa actual non lles permite recoller novos viaxeiros para a volta, polo que os coches regresan baleiros a Betanzos. Iso, segundo o Concello, «incrementa os custos de explotación, reduce a dispoñibilidade efectiva dos taxis e impide aproveitar un servizo que xa está operativo».

Barral defende que «a mobilidade da cidadanía non entende de fronteiras administrativas» e que a planificación dos servizos públicos tampouco debería facelo cando hai unha realidade funcional compartida. O goberno local confía en que a entrada na APC permita avanzar cara a un modelo de mobilidade máis coordinado e eficiente.

Os concellos de Sada e Bergondo tamén pediron entrar nesta área, pero a Xunta deixou esa posibilidade para unha segunda fase.

A ordenanza do taxi, á aprobación definitiva

No mesmo pleno, o goberno local levará a aprobación definitiva da ordenanza do taxi, que establece un servizo de 24 horas. A proposta é rexeitar as seis alegacións presentadas, todas elas por titulares de licenzas de taxi.

A principal pedía suprimir ou flexibilizar a obriga de ter un taxi de garda presencial na parada de 00.00 a 07.59 horas, os 365 días do ano. Os alegantes considerábana unha medida desproporcionada e sen estudo previo de demanda, que, segundo eles, causa prexuízos económicos, problemas de seguridade pola noite e dificultades de conciliación. Tamén alegaron que choca cos límites da contratación laboral e que xa existen outros servizos concertados, de urxencias médicas ou de VTC.

O Concello propón rexeitala a partir das conclusións dos seus servizos xurídicos. No informe de aprobación definitiva, a secretaria municipal sinala que a lei de transporte público obriga a garantir o servizo nocturno de taxi e que o Concello pode fixar quendas de parada para que a poboación teña un vehículo dispoñible sen esperas inxustificadas. O informe argumenta que Betanzos é cabeceira de comarca e polo de servizos básicos, e que a presenza na parada garante unha atención inmediata tanto nas urxencias como a quen non ten acceso a canles telemáticas ou concertadas. E conclúe que a colaboración de empresas privadas ou de VTC non exime o Concello do deber de garantir un servizo público de taxi na propia parada.

Tampouco se estiman outras dúas peticións: recuperar as prazas da parada da praza de Galicia, desprazando os vehículos da Policía Local detrás das xardineiras e dos bancos, e que o Concello entregase de balde a cada titular os escudos municipais para as portas dos coches e as cartolinas identificativas.

Unha das alegacións pedía, precisamente, crear unha área de prestación conxunta con outros concellos. O goberno local comparte esa petición, pero rexéitaa por motivos formais: entende que non se pode impoñer de xeito unilateral no texto dunha ordenanza municipal. Por iso a leva ao pleno por separado, como solicitude á Xunta.